Tuesday, October 11, 2016

ആര്‍ക്കാണ് തെറ്റ് പറ്റിയത്?!..

സ്നേഹമാണഖിലസാരമൂഴിയില്‍ 
എന്ന് പ്രഖ്യാപിച്ച കുമാരനാശാനോ?
സ്നേഹിക്ക ഉണ്ണി നീ നിന്നെ ദ്രോഹിക്കുന്ന ജനത്തെയും
എന്ന് പാടിയ വള്ളത്തോളിനോ?
രാഷ്ട്രത്തിനുവേണ്ടി ജീവത്യാഗം ചെയ്യാന്‍
ആഹ്വാനം ചെയ്ത രക്തസാക്ഷികള്‍ക്കോ?
ഒരു ജാതി ഒരു മതം ഒരു ദൈവം മനുഷ്യന്
എന്ന് പറഞ്ഞ ശ്രീനാരായണഗുരുവിനോ?
സദാചാരസംരക്ഷണത്തിനായ് മുറവിളികൂട്ടിയ
നമ്മുടെ സാമൂഹ്യപരിഷ്ക്കര്‍ത്താക്കള്‍ക്കോ?
ക്ഷമയും സഹനവുമാണ് ഏറ്റവും ശക്തമായ
ആയുധങ്ങളെന്നുകാണിച്ചുതന്ന മഹാത്മജിക്കോ?
വിദ്യാധനം സര്‍വ്വധനാല്‍ പ്രധാനമെന്നു
ആവര്‍ത്തിച്ചുദ്ഘോഷിച്ച ഗുരുവര്യര്‍ക്കോ?
തന്നെപ്പോലെത്തന്നേ മറ്റുള്ളവരേയും
സ്നേഹിക്കണമെന്നുരചെയ്ത ക്രിസ്തുവിനോ?
മറ്റുള്ളവരുടെ വിശപ്പകറ്റിമാത്രം ഭുജിക്കുക
എന്നരുളിയ മുഹമ്മദ്‌ നബിക്കോ?
അഹിംസയാണ് ലോകത്തിലേറ്റവും ശ്രേഷ്ഠം
എന്ന് പഠിപ്പിച്ച ശ്രീബുദ്ധനോ?
അഹംബ്രഹ്മാസ്മി എന്ന് പഠിപ്പിക്കുന്ന
ബ്രഹദാരണ്യകോപനിഷത്തിനോ?
തലപോകിലും ധര്‍മ്മച്യുതിയരുതേയെന്ന്
ഉദ്ഘോഷിക്കുന്ന പൗരാണികഗ്രന്ഥങ്ങള്‍ക്കോ?
തെറ്റുകള്‍ ചെയ്‌താല്‍ മോക്ഷം ലഭിക്കില്ലെന്നു
ഭീഷണിപ്പെടുത്തിയ ആത്മീയാചാര്യര്‍ക്കോ?
അതോ, മേല്പ്പറഞ്ഞതൊക്കെ ജീവിതത്തില്‍
ഉള്‍ക്കൊള്ളാന്‍ ശ്രമിക്കുന്ന പാവംമനുഷ്യര്‍ക്കോ?
ആര്‍ക്കാണിന്ന് തെറ്റുപറ്റിക്കൊണ്ടിരിക്കുന്നത്?!!...
എന്നുമെപ്പോഴും ഞാന്‍ അന്വേഷിക്കുന്ന പൊരുള്‍....
- ജോയ് ഗുരുവായൂര്‍

1 comment:

  1. ആര്‍ത്തിപിടിച്ചവരുടെയിടയില്‍ മൂല്യങ്ങള്‍ക്കെന്തു പ്രസക്തി!
    അവരവരുടെ തുരുത്തുളായി മാറുകയാണ്...
    ആശംസകള്‍

    ReplyDelete