ഗംഗയൊഴുകുന്നു ഗംഗയൊഴുകുന്നു..
ഹുങ്കു തിളയ്ക്കുമാമന്തരംഗങ്ങള്‍തന്‍
പങ്കം കഴുകിക്കൊണ്ടിന്നുമൊഴുകുന്നു.
ഗംഗയൊഴുകുന്നു ഗംഗയൊഴുകുന്നു...
ഹുങ്കു തിളയ്ക്കുമാമന്തരംഗങ്ങള്‍തന്‍
പങ്കം കഴുകിക്കൊണ്ടിന്നുമൊഴുകുന്നു.
ഗംഗയൊഴുകുന്നു ഗംഗയൊഴുകുന്നു...
കാട്ടാളരേക്കണ്ട കുഞ്ഞിന്‍കരച്ചിലും
വേട്ടായാടപ്പെട്ട പെണ്ണിന്‍ വിതുമ്പലും
കൂട്ടരേക്കുത്തിയ കുറ്റബോധങ്ങളും
കൂട്ടത്തിലെല്ലാമലിഞ്ഞങ്ങു പോകുന്നു...
വേട്ടായാടപ്പെട്ട പെണ്ണിന്‍ വിതുമ്പലും
കൂട്ടരേക്കുത്തിയ കുറ്റബോധങ്ങളും
കൂട്ടത്തിലെല്ലാമലിഞ്ഞങ്ങു പോകുന്നു...
വൃദ്ധര്‍തന്‍ വ്യഥകള്‍ സൃഷ്ടിച്ച ശാപവും,
ബുദ്ധിതന്‍ ചാപല്യമേറ്റിയ പാപവും,
ശുദ്ധിവരുത്താനായൊഴുകി-യൊഴുകിയ-
ശുദ്ധയായിന്നുമാ ഗംഗയൊഴുകുന്നു..
ബുദ്ധിതന്‍ ചാപല്യമേറ്റിയ പാപവും,
ശുദ്ധിവരുത്താനായൊഴുകി-യൊഴുകിയ-
ശുദ്ധയായിന്നുമാ ഗംഗയൊഴുകുന്നു..
മുജ്ജന്മപാപപരിഹാരം ദര്‍ഭയില്‍,
മുദ്രിതമാക്കുന്നു എള്ളുരുളകളായ്,
മൂന്നുവട്ടമങ്ങു മുങ്ങിനിവര്‍ന്നേവം,
മൂര്‍ച്ചകുറയ്ക്കുന്നു മാനസതാപങ്ങള്‍..
മുദ്രിതമാക്കുന്നു എള്ളുരുളകളായ്,
മൂന്നുവട്ടമങ്ങു മുങ്ങിനിവര്‍ന്നേവം,
മൂര്‍ച്ചകുറയ്ക്കുന്നു മാനസതാപങ്ങള്‍..
ആര്‍ത്തവരക്തം പുരളാത്ത മേനികള്‍,
ആര്‍ത്തിയോടങ്ങു കരണ്ട ജന്മങ്ങളും,
ആസക്തമൂര്‍ച്ഛയില്‍ കോമരംതുള്ളുന്ന
ആഭാസവൃന്ദവും പാപംകഴുകുന്നു..
ആര്‍ത്തിയോടങ്ങു കരണ്ട ജന്മങ്ങളും,
ആസക്തമൂര്‍ച്ഛയില്‍ കോമരംതുള്ളുന്ന
ആഭാസവൃന്ദവും പാപംകഴുകുന്നു..
പാതികരിഞ്ഞ ധാന്യശകലങ്ങളും,
പാതിവെന്തങ്ങലയുംകബന്ധവും,
പാപങ്ങളെല്ലാം തീര്‍ക്കാനായ്‌ നിത്യവും,
പാപനാശിനിയിലൊഴുകിത്തിമിര്‍ക്കുന്നു..
പാതിവെന്തങ്ങലയുംകബന്ധവും,
പാപങ്ങളെല്ലാം തീര്‍ക്കാനായ്‌ നിത്യവും,
പാപനാശിനിയിലൊഴുകിത്തിമിര്‍ക്കുന്നു..
കൊല്ലുന്ന, വെല്ലുന്ന, കുതികാലുവെട്ടുന്ന,
കാണാത്ത ഭാവത്തില്‍ തെറ്റുകള്‍ചെയ്യുന്ന,
കല്മഷമാര്‍ന്നൊരാ മാനസമൊക്കെയും,
കഴുകിവെളുപ്പിക്കാന്‍ ഗംഗയൊഴുകുന്നു..
കാണാത്ത ഭാവത്തില്‍ തെറ്റുകള്‍ചെയ്യുന്ന,
കല്മഷമാര്‍ന്നൊരാ മാനസമൊക്കെയും,
കഴുകിവെളുപ്പിക്കാന്‍ ഗംഗയൊഴുകുന്നു..
കാളായ പാപത്തിന്‍ കറയാം കരിനിറം,
കണ്മഷിയാക്കിയ ഗംഗതന്‍ തീരങ്ങള്‍,
കണ്ടാലറിയാത്തപോലിന്നു മരുവുന്നു,
കാളകൂടങ്ങള്‍തന്‍ തീവ്രമാം തീണ്ടലില്‍..
കണ്മഷിയാക്കിയ ഗംഗതന്‍ തീരങ്ങള്‍,
കണ്ടാലറിയാത്തപോലിന്നു മരുവുന്നു,
കാളകൂടങ്ങള്‍തന്‍ തീവ്രമാം തീണ്ടലില്‍..
ദൈവത്തെ രക്ഷിക്കാന്‍ കോട്ടകള്‍കെട്ടുന്ന,
ദാനത്തിന്‍ മറകളില്‍ ചൂഷണംചെയ്യുന്ന,
ധര്‍മ്മത്തിന്‍ശാസനം കാറ്റില്‍പറത്തുന്നൊ-
രധര്‍മ്മഭൂവിലീ ഗംഗികായൊഴുകുന്നു.
ദാനത്തിന്‍ മറകളില്‍ ചൂഷണംചെയ്യുന്ന,
ധര്‍മ്മത്തിന്‍ശാസനം കാറ്റില്‍പറത്തുന്നൊ-
രധര്‍മ്മഭൂവിലീ ഗംഗികായൊഴുകുന്നു.
ഗംഗയൊഴുകുന്നു ഗംഗയൊഴുകുന്നു..
ഹുങ്കു തിളയ്ക്കുമാമന്തരംഗങ്ങള്‍തന്‍,
പങ്കം കഴുകിക്കൊണ്ടിന്നുമൊഴുകുന്നു... (2)
ഹുങ്കു തിളയ്ക്കുമാമന്തരംഗങ്ങള്‍തന്‍,
പങ്കം കഴുകിക്കൊണ്ടിന്നുമൊഴുകുന്നു... (2)
- ജോയ് ഗുരുവായൂര്‍
No comments:
Post a Comment